💸 अहिल्यानगरमध्ये शेअर मार्केटच्या नावाखाली ७० लाखांची फसवणूक; श्रीगोंदा येथील एकावर गुन्हा..

दिनांक ३० ऑक्टोबर २०२५, श्रीगोंदा/अहिल्यानगर:

श्रीगोंदा येथील समीर सय्यद (रा. मुंजोबा चौक, श्रीगोंदा) याने शेअर मार्केटमध्ये मोठा परतावा मिळवून देण्याचे आमिष दाखवून अहिल्यानगरमधील तीन व्यावसायिकांना तब्बल ७० लाख रुपयांना गंडवले आहे.

महापालिकेचे ठेकेदार असलेले फिर्यादी इमान शेख, त्यांचे भाऊ अखलाख शेख आणि मित्र जहीर शेख यांनी सय्यदच्या बोलण्यावर विश्वास ठेवून २०२३ मध्ये ५ महिन्यांसाठी एकूण ७० लाख रुपये गुंतवले. २४ जून २०२४ रोजी रीतसर नोटरी करून हा व्यवहार झाला.

मुदत संपल्यावर आरोपीने दिलेले ३० लाख व ४० लाखांचे धनादेश (चेक्स) खात्यात पैसे नसल्याने ‘बाऊन्स’ झाले. फिर्यादींनी चौकशी केली असता, आरोपी समीर सय्यद हा अशाच फसवणुकीच्या गुन्ह्यात श्रीगोंदा येथे कारागृहात असल्याची माहिती त्यांना मिळाली.

फसवणूक झाल्याचे लक्षात येताच इमान शेख यांनी कोतवाली पोलिसांत फिर्याद दिली असून, पोलिसांनी समीर सय्यदविरुद्ध फसवणुकीचा गुन्हा दाखल केला आहे. पुढील तपास सहाय्यक पोलीस निरीक्षक तेजश्री थोरात करत आहेत.

स्रोत:(ऑनलाईन वृत्त)