दिनांक १० मार्च २०२६, श्रीगोंदा/नाशिक:
इन्स्टाग्रामवरील मैत्रीचा गैरफायदा घेत १५ वर्षीय शाळकरी मुलीला धमकावून अत्याचार केल्याची धक्कादायक घटना समोर आली आहे. या प्रकरणी नाशिकरोड पोलिसांनी अहमदनगर जिल्ह्यातील राहुरी आणि श्रीगोंदा येथील दोन संशयितांना अटक केली आहे.
पीडित मुलगी नाशिकरोड परिसरातील एका हायस्कूलमध्ये नववीत शिकते. दोन महिन्यांपूर्वी तिची ओळख इन्स्टाग्रामद्वारे सुरज उर्फ परशा जाधव (रा. वांबोरी, ता. राहुरी) याच्याशी झाली होती.
घटनेच्या दिवशी आरोपीने पीडितेला फोन करून नाशिकरोड बसस्थानकावर बोलावले आणि न आल्यास जीवे मारण्याची धमकी दिली. भीतीपोटी मुलगी तेथे पोहोचली, जिथे आरोपी सुरज आणि त्याचा साथीदार जयसिंग रमेश वाघ (रा. काष्टी, ता. श्रीगोंदा) दुचाकीवरून आले होते.
या दोघांनी तिला चेहेडीजवळील दारणा नदीकाठच्या जंगलात नेऊन तिच्यावर अत्याचार केला आणि तिचे फोटो व व्हिडिओही काढले.
मुलगी काही दिवसांनी भावाकडे सत्य कथन केल्यानंतर कुटुंबीयांना धक्का बसला. यानंतर शनिवारी पोलिसांत गुन्हा दाखल करण्यात आला.
नाशिकरोड पोलिसांनी तांत्रिक विश्लेषणाद्वारे लोकेशन शोधून राहुरी तालुक्यातील वांबोरीतून दोन्ही आरोपींच्या मुसक्या आवळल्या. त्यांच्याकडून गुन्ह्यात वापरलेली दुचाकी आणि मोबाईल जप्त करण्यात आला असून, न्यायालयाने त्यांना दोन दिवसांची पोलीस कोठडी सुनावली आहे.
स्रोत:(ऑनलाइन वृत्त)
