राष्ट्रीय महामार्ग-५४८ डी प्रकल्पांतर्गत संपादित केलेल्या जमिनीचा करोडोंचा मोबदला मिळवून देण्यासाठी १ लाख २० हजार रुपयांची लाच मागितल्याप्रकरणी लाचलुचपत प्रतिबंधक विभागाने (एसीबी) मोठी कारवाई केली आहे. या प्रकरणी महसूल विभागातील एका सहाय्यकासह कंत्राटी कर्मचाऱ्यावर गुन्हा दाखल करण्यात आला असून, या कारवाईमुळे जिल्हा प्रशासनात आणि महसूल वर्तुळात प्रचंड खळबळ उडाली आहे.
मंगेश बाळासाहेब दुगणे (महसूल सहाय्यक, उपविभागीय अधिकारी कार्यालय, श्रीगोंदा-पारनेर विभाग) आणि अमोल काशिनाथ खामकर (कंत्राटी कर्मचारी) अशी गुन्हा दाखल झालेल्या संशयित आरोपींची नावे आहेत. या दोघांविरुद्ध कोतवाली पोलीस ठाण्यात भ्रष्टाचार प्रतिबंधक कायद्यानुसार गुन्हा नोंदवण्यात आला आहे.
नेमके प्रकरण काय?
श्रीगोंदा तालुक्यातील एका शेतकऱ्याची सुमारे १४३ गुंठे जमीन रेल्वे उड्डाणपुलाच्या कामासाठी संपादित करण्यात आली होती. या जमिनीच्या बदल्यात शासनाकडून तब्बल १ कोटी ४७ लाख रुपयांची भरपाई मंजूर झाली होती. ही मोठी रक्कम शेतकऱ्याच्या बँक खात्यात जमा होण्यासाठी आवश्यक असलेली ‘एफटीओ’ (Funds Transfer Order) मंजुरी मिळवणे गरजेचे होते. हीच मंजुरी मिळवून देण्याच्या नावाखाली आरोपींनी तक्रारदाराकडे १ लाख २० हजार रुपयांच्या लाचेची मागणी केली.
लाचेची मागणी: ₹१,२०,०००/-
मंजूर झालेली भरपाई: ₹१,४७,०००,०००/- (१ कोटी ४७ लाख)
संपादित जमीन: १४३ गुंठे (श्रीगोंदा तालुका)
‘एसीबी’च्या पडताळणीत गुन्हा उघड
तक्रारदार शेतकऱ्याची लाच देण्याची इच्छा नसल्याने त्यांनी थेट लाचलुचपत प्रतिबंधक विभागाकडे (ACB) रीतसर दाद मागितली. एसीबीच्या पथकाने या तक्रारीची गंभीर दखल घेत ४ मे २०२६ रोजी तक्रारदार आणि आरोपींमधील मोबाईल संभाषणाची पडताळणी केली. त्यानंतर ६ मे रोजी केलेल्या कारवाईदरम्यान लाच मागितल्याचे निष्पन्न झाले. महसूल सहाय्यक मंगेश दुगणे यांच्या सांगण्यावरूनच कंत्राटी कर्मचारी अमोल खामकर याने ही लाच मागितल्याचे तपासात समोर आले आहे.
याप्रकरणी कोतवाली पोलीस ठाण्यात गुन्हा दाखल करण्यात आला असून, लाचलुचपत प्रतिबंधक विभाग या प्रकरणाचा पुढील तपास करत आहे
