दिनांक २८ नोव्हेंबर २०२५,अहिल्यानगर:
जिल्ह्यातील घटते लिंग गुणोत्तर रोखण्यासाठी जिल्हाधिकारी डॉ. पंकज आशिया यांनी सोनोग्राफी व गर्भपात केंद्रांची अचानक तपासणी करण्याचे आणि जन्म-मृत्यू नोंदी वेळेत करण्याचे कडक निर्देश दिले आहेत.
जिल्हाधिकारी कार्यालयात झालेल्या आढावा बैठकीत त्यांनी सांगितले की, नियमांचे उल्लंघन करणाऱ्या केंद्रांवर कठोर कारवाई करावी.
या बैठकीत खालील प्रमुख सूचनाही देण्यात आल्या:
- एचपीव्ही लसीकरण मोहीम: १४ वर्षे पूर्ण झालेल्या मुलींसाठी वैद्यकीय अधिकाऱ्यांचे प्रशिक्षण घेणे.
- प्रसूती नोंदणी: सर्व खासगी रुग्णालयांनी प्रसूतींची नोंदणी आरोग्य वाहिनी माहिती प्रणाली (HMIS) संकेतस्थळावर अनिवार्यपणे करणे.
- लसीकरण: नवजात बालकांना २४ तासांत हेपेटायटिस-बी (शून्य) लसीचा डोस देणे.
- क्षयरोग: खासगी डॉक्टरांनी क्षयरोग रुग्णांची माहिती व उपचार अहवाल वेळेवर सादर करणे.
- गरोदर मातांचा पाठपुरावा: पाठपुराव्यात ढिलाई न करता प्रलंबित प्रकरणे तातडीने निकाली काढावीत. जिल्ह्यातील आरोग्य निर्देशांक सुधारण्यासाठी सर्वांनी एकत्र येऊन काम करण्याचे आवाहन जिल्हाधिकाऱ्यांनी केले आहे.
स्रोत:(जिल्हा माहिती कार्यालय)
