🚨 श्रीगोंद्यात पुन्हा कायदा सुव्यवस्थेचा प्रश्न ऐरणीवर.! : काष्टी रोडवर किरकोळ वादातून निवृत्त उप जिल्हाधिकाऱ्यांच्या मुलावर प्राणघातक हल्ला..!

दिनांक २८ ऑक्टोबर २०२५, श्रीगोंदा:

श्रीगोंदा शहरात कायदा आणि सुव्यवस्थेचा प्रश्न पुन्हा एकदा ऐरणीवर आला आहे. मिळालेल्या अधिकृत माहितीनुसार, श्रीगोंदा शहरातील काष्टी रोडवरील काळोखे पंपासमोर किरकोळ कारणातून झालेल्या वादातून एका इसमावर प्राणघातक हल्ला करण्यात आला आहे. त्याला लोखंडी रॉड व हॉकी स्टिकने गंभीर मारहाण करण्यात आली असून, दोन इसमांच्या हल्ल्यात तो जखमी झाला आहे.

सविस्तर माहिती अशी की, ही घटना आज रात्री साधारण नऊ वाजण्याच्या सुमारास घडली. श्रीगोंदा शहरातील काळोखे पंपा समोर निवृत्त उप जिल्हाधिकारी असलेल्या एका व्यक्तीच्या मुलावर गाडीचा कट लागला. याच क्षुल्लक कारणावरून वाहन बाजूला घेण्यास भाग पाडून त्याला हॉकी स्टिक आणि लोखंडी रॉडने बेदम मारहाण करण्यात आली.

या घटनेमुळे श्रीगोंदा पोलीस प्रशासनाची शहरात आणि तालुक्यात असलेली दहशत कुचकामी ठरत असल्याचा सूर नागरिकांमधून उमटत आहे. लोकांच्या पोलिसांकडून असलेल्या अपेक्षा सपशेल फोल ठरल्याने अशा घटना सातत्याने घडताना दिसत आहेत. संपूर्ण शहरात कायदा आणि सुव्यवस्थेचा बोजवारा उडाला असून, अशा घटना आता श्रीगोंदा शहरवासीयांना नवीन राहिलेल्या नाहीत, असे चित्र आहे.

मागे काही दिवसांपूर्वीच भर चौकात मांडवगण रोडवर चार-पाच लोकांच्या जमावाने दगड आणि काठ्यांनी हल्ला चढवून स्कॉर्पिओ गाडीचे मोठे नुकसान केले होते. भर वर्दळीच्या ठिकाणी दगडफेक झाल्याने परिसरात भीतीचे वातावरण निर्माण झाले होते.

या वाढत्या घटनांच्या पार्श्वभूमीवर, “पोलीस निरीक्षक हे श्रीगोंदा शहरात कायदा आणि सुव्यवस्था राखण्यात अपयशी ठरले आहेत का.?” असा प्रश्न सर्वसामान्य लोकं उपस्थित करत आहेत. श्रीगोंदा पोलिसांनी शहरात वाढलेल्या गुन्हेगारीला त्वरित पायबंद घालून नागरिकांमध्ये सुरक्षिततेची भावना निर्माण करण्याची गरज आहे.

जखमी व्यक्तीवर उपचार सुरू असून, श्रीगोंदा पोलीस पुढील तपास करत आहेत. पोलीस ठाण्यात गुन्हा दाखल करण्याची प्रक्रिया सुरू आहे..

स्रोत:(अधिकृत माहितीनुसार)