दिनांक १९ ऑगस्ट २०२६, श्रीगोंदा :
अहिल्यानगर जिल्ह्यातील गाजलेल्या कोट्यवधींच्या सिस्पे घोटाळ्यातील मुख्य आरोपी राहुल शामराव काळोखे याला फिजी देशातून इंटरपोलच्या मदतीने भारतात आणल्यानंतर आता न्यायालयीन कोठडी सुनावण्यात आली आहे. आर्थिक गुन्हे शाखेकडून (EOW) या प्रकरणी दाखल चार गुन्ह्यांचा सखोल तपास सुरू आहे.
श्रीगोंदा पोलीस ठाण्यात दाखल गुन्ह्यात मिळालेली पोलीस कोठडी संपल्यानंतर आरोपीची अहिल्यानगर उपकारागृहात (न्यायालयीन कोठडीत) रवानगी करण्यात आली आहे.
सिस्पे, इनफिनाईट बीकन व तत्सम कंपन्यांच्या माध्यमातून गुंतवणूकदारांना जास्त परताव्याचे खोटे आश्वासन देऊन हा घोटाळा करण्यात आला. याप्रकरणी श्रीगोंदा, सुपा आणि तोफखाना पोलीस ठाण्यांत एकूण चार गुन्हे दाखल आहेत.
या प्रकरणात आतापर्यंत १३ संशयित आरोपींना अटक केली असून, सुमारे ११४ कोटी ९३ लाख रुपयांच्या मालमत्तेच्या जप्तीचा (MPID कायद्यांतर्गत) प्रस्ताव राज्य शासनाने मंजूर केला आहे.
सुपा आणि तोफखाना पोलीस ठाण्यातील गुन्ह्यांमध्ये वर्ग करून आरोपीचा पुढील तपास केला जाण्याची शक्यता आहे. पोलीस निरीक्षक डॉ. शरद गोर्डे यांच्या मार्गदर्शनाखाली आर्थिक गुन्हे शाखा संशयितांच्या व्यवहारांची सखोल पडताळणी करत आहे.
स्रोत:(ऑनलाईन वृत्त)
