दिनांक ४ मे २०२५, श्रीगोंदा:
“महाराष्ट्र बारव मोहिम” अंतर्गत शिवदुर्ग ट्रेकर्स फाऊंडेशन व शिवदुर्ग वारसा संवर्धन समितीच्या वतीने बेलवंडी कोठार येथिल ९०० वर्षापूर्वीच्या पुरातन बारवची सलग दुसऱ्या आठवड्यात श्रमदान मोहीम राबविण्यात आली. ही ४७ वी. स्वच्छता श्रमदान मोहीम होती.यामध्ये १३ शिवदुर्ग सदस्यांनी सहभाग नोंदवला.
शिवदुर्ग ट्रेकर्स फाऊंडेशनचे अध्यक्ष राजेश इंगळे यांच्या मार्गदर्शनाखाली व वारसा संवर्धन समितीचे अध्यक्ष डॉ. चंद्रशेखर कळमकर यांच्या नियोजनात ही मोहिम पार पडली.
शिवदुर्ग सदस्यांनी ही बारव स्वच्छता मोहीम राबवतांना बारवेच्या आतील तळाशी गाळ काढायला सुरुवात केली आहे. अडीच तास श्रमदान केले. बारवेच्या तळाशी थडी धरून गाळ काढण्याचे कार्य सूरू आहे. गाळाने बुजलेल्या दोन दगडी पायऱ्या मोकळ्या करण्यात आज यश मिळाले. अंदाजे दोन ट्रॉली गाळमाती बाहेर काढण्यात यश मिळाले. संपुर्ण श्वास मोकळा करायचा आहे.
या मोहिमेत अध्यक्ष डॉ चंद्रशेखर कळमकर, उपाध्यक्ष दिगंबर भुजबळ, अमोल बडे, प्रा.प्रणव गलांडे, ऍड.गोरख कडूस, मारूती वागसकर, तुषार चौधरी, रहिम हवालदार, ईश्वर कोठारे, आयुष बडे, शंभुराजे कडूस, कुणाल खोमणे यांनी उत्स्फूर्तपणे सहभाग नोंदवला. शिवराज्याभिषेक सोहळयापर्यंत ही मोहिम सुरूच राहील.
बारव श्रमदान करून समाधान मिळते.
स्थापत्य कलेचाअद्भुत नमुना आपल्या पूर्वजांचा वैभवशाली ऐतिहासिक वारसा असणाऱ्या बारव जतन करण्यासाठी शिवदुर्ग परिवाराने पुढाकार घेतला आहे. तरुणाई सोबत श्रमदान करून मोठं समाधान मिळतेय.
बारवेचा गुदमरलेला श्वास मोकळा करतांना आम्हाला आपल्या पूर्वजांचे ऋण फेडण्यासाठी अंगात वेगळीच वीरश्री संचारली असल्याचा भास जाणवतो. असे समाधान,आनंद कुठंच मिळत नाही. आम्ही बारव श्रमदान करतो याचा आम्हा सर्वांना सार्थ अभिमान वाटतो.
डॉ. चंद्रशेखर कळमकर (अध्यक्ष – शिवदुर्ग वारसा संवर्धन समिती.)
स्रोत:(प्रसिद्धी पत्र)
