दिनांक २२ नोव्हेंबर २०२४,श्रीगोंदा:
श्रीगोंदा/नगर विधानसभा सार्वत्रिक निवडणूक २०२४ चा कार्यक्रम १५ ऑक्टोबर २०२४ रोजी भारत निवडणूक आयोगाने घोषित केला होता. त्या अनुषंगाने २२६ – श्रीगोंदा विधानसभेची निवडणूक २० नोव्हेंबर रोजी शांततेत पार पडली. या निवडणुकीत ३,३९,५२६ मतदारांपैकी २,५०,७३४ मतदारांनी आपल्या मतदानाचा हक्क बजावला, ज्यामुळे मतदारांनी उत्स्फूर्त सहभाग नोंदवला आहे.
मतमोजणी प्रक्रिया २३ नोव्हेंबर २०२४ रोजी सकाळी ८:०० वाजता सुरू होणार आहे. ही प्रक्रिया श्रीगोंदा येथील पेडगाव रोडवरील शासकीय धान्य गोदामात होणार आहे. मतमोजणीसाठी ईव्हीएम मशीनसाठी १४ टेबल आणि पोस्टल मतदान मोजण्यासाठी ११ टेबल अशी यंत्रणा उभारण्यात आली आहे.
मतमोजणीच्या ठिकाणी शांतता आणि सुरक्षितता राखण्यासाठी प्रशासनाने कडक उपाययोजना केल्या आहेत. केंद्रीय राखीव पोलीस दल (सीआरपीएफ) आणि महाराष्ट्र पोलीस यांची विशेष नियुक्ती करण्यात आली आहे. संपूर्ण मतमोजणी प्रक्रिया शांततेत पार पडावी, यासाठी प्रशासनाने पूर्वतयारी पूर्ण केली आहे.
मतमोजणीसाठी आवश्यक सर्व सुविधा पुरवल्या गेल्या असून, निवडणूक आयोगाच्या मार्गदर्शक तत्त्वांनुसार प्रक्रिया पार पाडली जाईल. प्रत्येक टप्प्यावर अधिकारी व कर्मचारी तैनात असतील. श्रीगोंदा विधानसभा निवडणुकीतील अंतिम निकाल हा मतमोजणीनंतर जाहीर केला जाईल.
श्रीगोंदा मतदारसंघातील मतमोजणीची प्रक्रिया शांततेत आणि पारदर्शकपणे पार पडेल, अशी खात्री प्रशासनाने व्यक्त केली आहे.
स्रोत:(प्रसिद्धी पत्र)
