दिनांक २९ सप्टेंबर २०२५ श्रीगोंदा/अहिल्यानगर:
महाराष्ट्रातील, विशेषतः मराठवाड्यातील शेतकऱ्यांचे परतीच्या पावसाने मोठे नुकसान केले आहे. अतिवृष्टीमुळे निर्माण झालेल्या महाभयंकर पूरस्थितीमुळे शेतजमिनी वाहून गेल्या असून, हाताशी आलेले पीक उद्ध्वस्त झाले आहे.
अनेकांचे संसार डोळ्यादेखत पुराच्या पाण्यात वाहून गेले आहेत, तसेच जनावरे आणि गुरेढोरेही मृत्यूमुखी पडली आहेत. या भीषण संकटातून शेतकऱ्याला पुन्हा उभे करण्यासाठी सरकारने कोणतेही निकष न लावता तिजोरी खुली करावी, अशी आग्रही मागणी संभाजी ब्रिगेडने केली आहे.
या मागणीसाठी सोमवारी (२९ सप्टेंबर २०२५) संपूर्ण महाराष्ट्रात संभाजी ब्रिगेडच्या कार्यकर्त्यांनी शेतकऱ्यांच्या प्रश्नांवर ‘जागरण गोंधळ’ आंदोलन छेडले. हाताशी आलेले पीक वाहून गेल्याने शेतकऱ्यांची जगण्याची उमेद संपुष्टात आली आहे. या भीषण परिस्थितीमुळे येणाऱ्या काळात शेतकरी आत्महत्या करू शकतात, अशी भीती निर्माण झाली आहे.
त्यामुळे, या बिकट परिस्थितीत सरकारने तातडीने हस्तक्षेप करावा, अशी मागणी संभाजी ब्रिगेडने केली आहे. त्यांच्या प्रमुख मागण्या खालीलप्रमाणे आहेत:
- भरघोस मदत: सरकारने कोणतेही निकष न लावता तिजोरी खुली करून पूरग्रस्तांना भरघोस मदत करावी.
- हेक्टरी मदत: शेतीच्या नुकसानीसाठी हेक्टरी किमान १ लाख रुपयांची मदत देण्यात यावी.
- कर्जमाफी: शेतकऱ्यांचे संपूर्ण कर्ज माफ करण्यात यावे.
- गुराढोरांना नुकसानभरपाई: मृत्यूमुखी पडलेल्या गुराढोरांना बाजारभावानुसार नुकसानभरपाई मिळावी.
शेतकऱ्यांना पुन्हा एकदा शून्यातून आपल्या नव्या आयुष्याची सुरुवात करण्यासाठी सरकारने तत्काळ आणि भरीव मदत करणे आवश्यक आहे, असे मत संभाजी ब्रिगेडच्या कार्यकर्त्यांनी व्यक्त केले.
या आंदोलनात जिल्हाध्यक्ष राजेश गणपतराव परकाळे, श्रीगोंदा तालुकाध्यक्ष इंजी. शाम जरे, पारनेर तालुकाध्यक्ष सचिन काकडे, नगर तालुकाध्यक्ष महेश दानवे, तसेच सुयोग धस, दिलीप वाळुंज, बापू जगताप, अच्युत गाडे, तरटे तात्या, विकास उदगीरे, अंबादास जाधव, संदीप मांडरे, सागर भोस, शंतनु जाधव, अमोल आगलावे, देविदास गवळी, विकास पवार, दिलीप आगलावे, संतोष कोकाटे, सुभाष आगलावे, बालू बोरुडे, धोंडीराम आगलावे आदी मान्यवर उपस्थित होते.
स्रोत:(ऑनलाईन वृत्त)
