दिनांक १८ मार्च २०२५, श्रीगोंदा::
मांडवगण (ता. श्रीगोंदा) येथे लहान मुलांच्या भांडणावरून सुरू झालेल्या वादाचे पर्यवसान मोठ्या हाणामारीत झाले. या घटनेत प्रशांत चव्हाण (वय २८, रा. चव्हाणवस्ती, मांडवगण) यांच्यावर जातीवाचक शिवीगाळ करत प्राणघातक हल्ला करण्यात आला. श्रीगोंदा पोलिस ठाण्यात फिर्याद दाखल करण्यात आली असून, या प्रकरणी नऊ जणांविरोधात गुन्हा दाखल करण्यात आला आहे.
१७ मार्च रोजी सकाळी १० वाजता मांडवगण येथे लहान मुलांमध्ये भांडण झाले होते. त्यानंतर गावातील काही प्रतिष्ठित व्यक्तींनी मध्यस्थी करून वाद मिटवला. मात्र, संध्याकाळी ६:३० वाजता, प्रशांत चव्हाण हे पाणी आणण्यासाठी जात असताना, चौकात त्यांच्या मित्रांसोबत उभे होते. त्याच वेळी उमेश वेताळ, किरण गायकवाड, प्रतिक लष्करे, योगेश जाधव, विशाल कुसेकर, ऋतीक जाधव, गोकुळ मनोरे, शिवलाल मिरेकर आणि महेश वाघमोडे हे बुलेट, पल्सर, केटीएम व स्प्लेंडर मोटारसायकलींवर आले.
या टोळक्याने जातिवाचक शिवीगाळ करत प्रशांत चव्हाण आणि त्यांच्या मित्रांवर हल्ला केला. उमेश वेताळ आणि किरण गायकवाड यांनी लाकडी दांडक्याने त्यांच्या डोक्यात, तोंडावर आणि कानावर मारहाण केली. त्यानंतर किरण गायकवाड याने बुलेटवर लावलेली तलवार काढून, “तुला जिवे ठार मारीन,” अशी धमकी दिली.
या हल्ल्यात प्रशांत चव्हाण यांचे मित्र शुभम चव्हाण, सुरज चव्हाण, सिद्धार्थ घोडके हे मदतीसाठी धावले असता त्यांनाही लाथाबुक्यांनी मारहाण करण्यात आली. काही वेळातच गावातील नागरिक जमा झाल्याने आरोपी घटनास्थळावरून पळून गेले. जात जात त्यांनी “तुम्हाला एक एकाला सोडणार नाही,” अशी धमकी दिली.
या हल्ल्यात गंभीर जखमी झालेल्या प्रशांत चव्हाण यांना त्यांच्या भावाने उपचारासाठी खाजगी रुग्णालयात नेले. उपचारानंतर त्यांनी श्रीगोंदा पोलिस ठाण्यात फिर्याद दाखल केली.
पोलिसांनी आरोपींविरोधात कलम ३२६ (प्राणघातक हल्ला), ५०४ (शिवीगाळ), ५०६ (धमकी), अनुसूचित जाती-जमाती अत्याचार प्रतिबंधक कायदा आणि इतर संबंधित कलमांतर्गत गुन्हा नोंदवला आहे. पुढील तपास पोलिस करत आहेत.
स्रोत:(अधिकृत माहिती नुसार)
