दिनांक २१ जून २०२४, अहमदनगर:
महाविकास आघाडीला नकारात्मक प्रचारातून मिळालेले यश फार काळ टिकणार नाही, असे प्रतिपादन महसूल तथा पालक मंत्री ना. राधाकृष्ण विखे पाटील यांनी केले. नगर जिल्ह्यातील निर्णायक मतदानामुळे महायुतीचे उमेदवार किशोर दराडे यांच्या विजयासाठी कटिबद्ध होण्याचे आवाहन त्यांनी केले. विधानपरिषद निवडणुकीसाठी आयोजित पदाधिकाऱ्यांच्या बैठकीत ते बोलत होते.
या बैठकीला जेष्ठ नेते खिलारी गुरूजी, उमेदवार किशोर दराडे, शिवाजीराव कर्डीले, भाजपाचे जिल्हाध्यक्ष दिलीप भालसिंग, विठ्ठलराव लंघे, प्रा. भानूदास बेरड, सुनिल पंडीत, अभय आगरकर, नितीन दिनकर, बाबुशेठ टायरवाले, मनसेचे जिल्हाध्यक्ष बाबा शिंदे, रासपच्या जिल्हाध्यक्षा सुवर्णा जर्हाड, लहूजी सेनेचे जिल्हाध्यक्ष सुनिल शिंदे, मुख्याध्यापक संघाचे संभाजी पवार यांच्यासह शिक्षक आणि पदाधिकारी उपस्थित होते.
ना. विखे पाटील यांनी लोकसभा निवडणुकीत शिर्डी आणि अहील्यानगर मतदार संघातील पदाधिकारी आणि कार्यकर्त्यांचे आभार मानले. त्यांनी महाविकास आघाडीच्या नकारात्मक प्रचाराची टीका केली आणि दावा केला की, हे वातावरण फार काळ टिकणार नाही.
विधानपरिषद निवडणुकीत महायुतीचे उमेदवार किशोर दराडे यांच्या विजयासाठी सर्वांनी एकत्र येऊन प्रयत्न करण्याचे आवाहन केले. नाशिक पदवीधर निवडणूक ही संधी असून महायुतीच्या उमेदवाराच्या विजयासाठी मतदान सुनिश्चित करण्याचे आवाहन केले.
विकासाच्या मुद्द्यांवर चर्चा करताना विखे पाटील यांनी केंद्र आणि राज्यात युतीचे सरकार असल्याचे सांगितले. नव्या शैक्षणिक धोरणाची अंमलबजावणी यशस्वी करण्यासाठी वरीष्ठ सभागृहात आपल्या हक्काचे प्रतिनिधी असणे गरजेचे असल्याचे त्यांनी नमूद केले. अहील्यानगरमधील १७ हजार निर्णायक मतांसाठी तालुका स्तरावर नियोजन करण्याचे निर्देश दिले.
किशोर दराडे यांनी मागील सहा वर्षांतील आपल्या कामांचा आढावा घेतला आणि विरोधकांकडून पसरवल्या जाणाऱ्या अफवांची स्पष्टता केली. दराडे म्हणाले की, नगर मधील मतदार सुज्ञ आहेत आणि राजकारण बाजूला ठेवून शिक्षकांच्या पेन्शनचा निर्णय महायुती सरकारने घेतला आहे. याप्रसंगी शिवाजीराव कर्डीले, प्रा. भानूदास बेरड, आणि संभाजी पवार यांनीही आपले विचार मांडले.
स्रोत:(प्रसिद्धी पत्र)
