दिनांक १२ फेब्रुवारी २०२५, श्रीगोंदा:
श्रीगोंदा शहरालगत असलेल्या जामखेड-काष्टी रोड परिसरातील आणि श्रीगोंदा नगरपालिका हद्दीतील अतिक्रमण हटविण्यासाठी सार्वजनिक बांधकाम विभाग व नगरपालिका यांच्या संयुक्त कारवाईचा बडगा उचलला जाणार आहे. दि. १३ व १४ फेब्रुवारी २०२५ रोजी सकाळी ९:३० वाजता ही मोहीम राबवली जाणार असून, अतिक्रमण हटवण्यासाठी ५० जवानांचा फौजफाटा तैनात करण्यात आला आहे.
अतिक्रमणधारकांना नोटिसा, पण प्रतिसाद नाही
श्रीगोंदा नगरपालिका प्रशासनाने अतिक्रमणधारकांना आधीच नोटिसा बजावून, स्वयंस्फूर्तीने अतिक्रमण हटवण्याची सूचना दिली होती. मात्र, शहरातील तसेच महामार्गालगत असलेल्या अतिक्रमणधारकांनी या नोटिसांकडे फारसे गांभीर्याने पाहिले नाही. परिणामी, आता प्रशासनाने कठोर पावले उचलण्याचा निर्णय घेतला आहे.
काय अतिक्रमण हटवले जाणार?
या मोहिमेअंतर्गत रस्त्यालगत असलेले फ्लेक्स, डिजिटल बोर्ड, शेड, टपऱ्या, तसेच दुकानांसमोर लावलेले अनधिकृत फ्लेक्स व इतर अडथळे हटवले जाणार आहेत. या मोहिमेसाठी पोलिस दलही सज्ज असून, कोणत्याही अनुचित प्रकारास आळा घालण्यासाठी कडक बंदोबस्त ठेवण्यात आला आहे.
नागरिकांचे लक्ष मोहिमेकडे
श्रीगोंद्यातील व्यापारी, दुकानदार आणि नागरिक या मोहिमेकडे विशेष लक्ष ठेवून आहेत. मागील काही महिन्यांपासून या भागातील अतिक्रमण हटवण्याच्या हालचाली सुरू होत्या. मात्र, अतिक्रमणधारकांच्या विरोधामुळे हा निर्णय लांबणीवर पडत होता. अखेर, १३ व १४ फेब्रुवारीला ही कारवाई करण्यात येणार असल्याने संपूर्ण शहरात याबाबत उत्सुकता व चिंतेचे वातावरण आहे.
प्रशासनाची ठाम भूमिका
नगरपालिका व सार्वजनिक बांधकाम विभागाने स्पष्ट केले आहे की, कायद्याचा बडगा उचलून हे अतिक्रमण हटवले जाईल आणि कोणालाही कोणतीही सवलत दिली जाणार नाही. त्यामुळे अतिक्रमणधारकांनी स्वयंस्फूर्तीने आपली अतिक्रमणे काढून घेणे हिताचे ठरेल, असा इशाराही प्रशासनाने दिला आहे.
स्रोत:(अधिकृत माहिती नुसार)
