दिनांक ८ जुलै २०२५, घारगाव (ता. श्रीगोंदा):
नगर-दौंड महामार्गावर आज दुपारी दीडच्या सुमारास घारगावजवळ एक भीषण अपघात घडला. भरधाव वेगात जात असलेल्या कारचा टायर अचानक फुटल्याने गाडी नियंत्रणाबाहेर जाऊन थेट रस्त्याच्या मधोमध असलेल्या डीव्हायडरवर आदळली आणि पलटी झाली. या अपघातात कारमधील चालक गंभीर जखमी झाला आहे.
प्राथमिक माहितीनुसार, अहिल्यानगर तालुक्यातील केडगाव परिसरातील एक चालक टाटा नेकसॉन कारने दौंडच्या दिशेने जात असताना, घारगावजवळ गाडीचा टायर फुटला. टायर फुटताच कारने संतुलन गमावले आणि ती उलटून रस्त्यावर आडवी झाली.
घटनेनंतर काही क्षणातच स्थानिक ग्रामस्थांनी घटनास्थळी धाव घेतली. त्यांनी गाडीतील जखमी चालकाला बाहेर काढून तात्काळ वैद्यकीय उपचारासाठी रुग्णालयात हलवले. मिळालेल्या माहितीनुसार, चालकाच्या हाताला व पायाला गंभीर दुखापत झाली असून त्याच्यावर उपचार सुरू आहेत.
सुदैवाने कारमध्ये इतर कोणीही प्रवासी नसल्याने मोठा अनर्थ टळला. या अपघातामुळे काही काळ वाहतूक विस्कळीत झाली होती.
स्रोत:(ऑनलाईन माहिती)
