दिनांक २४ सप्टेंबर २०२५,श्रीगोंदा:
महाराजा जिवाजीराव शिंदे महाविद्यालयातील रयत संकुलाच्यावतीने पद्मभूषण डॉ. कर्मवीर भाऊराव पाटील यांची जयंती मोठ्या उत्साहात साजरी करण्यात आली. यावेळी रयत शिक्षण संस्थेचे सचिव व माजी सनदी अधिकारी विकास देशमुख प्रमुख पाहुणे म्हणून बोलत होते.
“कर्मवीर भाऊराव पाटील यांच्या त्यागातून उभी राहिलेल्या रयत शिक्षण संस्थेने शिक्षणापासून वंचित राहिलेल्या समाजाला शिक्षणाची संधी दिली आहे. ही संस्था एका विशाल वटवृक्षासारखी आहे,” असे प्रतिपादन त्यांनी केले.
या कार्यक्रमाचे प्रमुख वक्ते, कर्मवीर भाऊराव पाटील विद्यापीठाचे कुलगुरू डॉ. ज्ञानदेव मस्के यांनी महात्मा फुले यांच्या सत्यशोधक विचारांवर कर्मवीरांची निष्ठा होती, असे सांगितले. त्यांनी कर्मवीर भाऊराव पाटील, महात्मा फुले, डॉ. बाबासाहेब आंबेडकर, संत तुकाराम, फातिमा शेख, आणि शेख महंमद महाराज यांच्या विचारांचे स्मरण करत, ज्ञान, विज्ञान आणि तंत्रज्ञानाचा वापर करून सुदृढ समाज घडवण्याचे आवाहन केले.
कार्यक्रमाच्या अध्यक्षस्थानी माजी मंत्री आणि महाविद्यालय विकास समितीचे चेअरमन बबनराव पाचपुते होते. “शिक्षणाने माणूस घडतो आणि कष्टाने तो मोठा होतो. कर्मवीरांचा विचार हा सर्वसमावेशक असून, बहुजनांचे कल्याण करणारा आहे,” असे मत त्यांनी व्यक्त केले. त्याचबरोबर, त्यांनी मोबाईल आणि तंत्रज्ञानाचा योग्य वापर करण्याचे आवाहनही विद्यार्थ्यांना केले.
यावेळी जिल्हा परिषदेचे माजी अध्यक्ष बाबासाहेब भोस यांनी रयत संकुलातील गुणवत्तापूर्ण शिक्षणाबद्दल समाधान व्यक्त केले.
कार्यक्रमाची ठळक वैशिष्ट्ये:
- कार्यक्रमाचे प्रास्ताविक प्रभारी प्राचार्य डॉ. महादेव जरे यांनी केले.
- प्रमुख मान्यवरांच्या हस्ते ‘भगीरथ’ या नियतकालिकाचे प्रकाशन करण्यात आले. संपादक डॉ. राजेंद्र ठाकरे यांनी नियतकालिकाबद्दल मनोगत व्यक्त केले.
- नवीन संगणक प्रयोगशाळेचे उद्घाटनही मान्यवरांच्या हस्ते झाले.
- ग्रंथालय विभागातर्फे ग्रंथ प्रदर्शन आयोजित करण्यात आले होते. तसेच, ‘कर्मवीरायन’ या ग्रंथाचे प्रकट वाचन विद्यार्थ्यांनी आणि शिक्षकांनी केले. याचे संयोजन ग्रंथपाल प्रा. यशोदा लबडे यांनी केले.
- माजी नगराध्यक्ष मनोहर पोटे यांनी महादजी शिंदे विद्यालयाला १ लाख ११ हजार रुपयांची देणगी दिली.
- पत्रकार पिटर रणसिंग यांनी गरीब विद्यार्थ्यांना गणवेश दिले.
या समारंभाला महावीर पटवा, पोपटराव खेतमाळीस, उद्योजक संजय मचे, सुभाषशेठ गांधी, कुंडलिकराव दरेकर, विभागीय अधिकारी नवनाथ बोडखे, प्राचार्य तुकाराम कन्हेरकर, जयश्रीताई दरेकर, रत्नप्रभा बोरुडे, सतीश मखरे, प्रा. चंद्रकांत नगरे, प्रा. शिवाजी सोनावळे, प्रा. मधुकर खोमणे, प्रा. पंडितराव अनभुले, अशोक गोंधळी, मुख्याध्यापिका वर्षा भोईटे, चांदणी खेतमाळीस, अश्विनी युवराज रणसिंग, आणि अनेक शिक्षणप्रेमी नागरिक मोठ्या संख्येने उपस्थित होते.
कार्यक्रमाचे सूत्रसंचालन प्रा. देवेंद्र बहिरम आणि प्रा. संजय फटे यांनी केले. तर, आभार प्राचार्य दिलीप भुजबळ यांनी मानले.
स्रोत:(प्रसिद्धी पत्र)
