दिनांक २३ सप्टेंबर २०२४, श्रीगोंदा:
शिवसेना (उद्धव बाळासाहेब ठाकरे) पक्षाचे उपनेते साजन पाचपुते यांनी श्रीगोंदा मतदारसंघातून आमदारकीची उमेदवारी जाहीर केली आहे. त्यांनी नुकत्याच घेतलेल्या पत्रकार परिषदेत हे स्पष्ट केले की, पक्षाने संधी दिल्यास ते निश्चितच आमदारकी लढवणार आहेत. पाचपुते यांनी पक्षाच्या धोरणावर ठाम राहून, वरिष्ठ नेत्यांच्या निर्णयानुसार कार्य करण्याची भूमिका घेतली आहे.
त्यांनी पत्रकार परिषदेत सांगितले की, “शिवसेना पक्षावर माझी निष्ठा कायम आहे, आणि पक्षाचे धोरण पाळूनच मी माझ्या मतदारसंघातील जनतेसाठी काम करत राहीन.” पाचपुते यांची ही घोषणा आगामी निवडणुकांसाठी महत्त्वपूर्ण ठरू शकते, कारण श्रीगोंदा मतदारसंघात त्यांची लोकप्रियता वाढताना दिसत आहे.
एम.आय.डी.सी. प्रश्नावर भर..
साजन पाचपुते यांनी श्रीगोंदा एम.आय.डी.सी.चा प्रलंबित प्रश्न मार्गी लावण्यासाठी आपला पुढाकार असणार असल्याचे स्पष्ट केले. त्यांनी मतदारसंघातील तरुणांसाठी रोजगाराच्या संधी वाढवण्याचा निर्धार व्यक्त केला. “एम.आय.डी.सी. प्रश्न सोडवून, तरुणांना भरपूर रोजगाराच्या संधी उपलब्ध करून दिल्या जातील. या मतदारसंघातील तरुण वर्गाकडून माझ्याकडून मोठ्या अपेक्षा आहेत आणि त्यांची निराशा होणार नाही,” असे ते म्हणाले.
पाचपुते यांनी श्रीगोंदा मतदारसंघातील इतर समस्यांवरही भाष्य केले. पाणीपुरवठा, शेतकरी प्रश्न, शिक्षण व्यवस्थेतील सुधारणा यावर काम करण्याची इच्छा त्यांनी व्यक्त केली. मतदारसंघातील प्रत्येक घटकाच्या कल्याणासाठी आपली भूमिका ठाम असल्याचे सांगून, आगामी निवडणुकीत महाविकास आघाडीच्या धर्माशी बांधील राहून पक्षाच्या निर्देशानुसारच काम करण्याचा त्यांनी निर्धार व्यक्त केला.
“मी पक्षाच्या वरिष्ठ नेत्यांसोबत सल्लामसलत करूनच निर्णय घेणार आहे. श्रीगोंदा मतदारसंघाच्या विकासासाठी माझे प्राधान्य कायम राहणार आहे,” असेही पाचपुते यांनी नमूद केले.
साजन पाचपुते यांनी पुढील निवडणुकीसाठी जोरदार तयारी सुरु केली आहे. मतदारसंघातील जनतेशी संवाद साधत, त्यांच्या अडचणी समजून घेतल्या आहेत. आगामी काळात आपल्या मतदारसंघात विकासकामे मार्गी लागतील आणि त्यातून सर्वसामान्य जनतेचे प्रश्न सुटतील, असा विश्वास त्यांनी व्यक्त केला. यामुळे आगामी निवडणुकीत श्रीगोंदा मतदारसंघात मोठी चुरस पाहायला मिळू शकते.
स्त्रोत:(पत्रकार परिषद)
